المتصل: أنا كنت متجوز لي سبع شهور ومراتي يعني فيه عمل معمول لها إن هي ما تخلفش. الشيخ: من سبع شهور بس متزوج؟ المتصل: آه الشيخ: وعرفت إن فيه عمل وإن هي ما بتخلفش. عرفت منين؟ المتصل: أنا عرفت من ساعة ما واحد قالي إن مراتك معمولها عمل. الشيخ: يعني واحد قال لك كده مقولة يعني؟ المتصل: مش مقولة أنا سألت واحد وقولتله على اسمها واسم أمها فعرف إنها معمول لها عمل. الشيخ: عراف يعني أو حاجة؟ المتصل: وبتحس بحاجات وهي داخلة الحمام. الشيخ: لأ، أنا عايز أعرف اللي قال لك ده شاف الست اللي بتعمل العمل ولا واحد عراف ودجال هو اللي قال لك إن معمول لها عمل؟ المتصل: لأ، ده واحد اللي قال لي، أنا سألته، طلب اسم أمها واسمها هي فقلت له. الشيخ: سألك عن اسم أمها؟ لا تثق في كلامه ده ساحر، اللي يسألك عن حد ويقول لك اسم أمه إيه؟ أو اسم أمها إيه؟ ده إنسان ساحر مفسد في الأرض ما تسمعش لكلامه. لكن أنا عمومًا هقول لك حتى لو فُرض وفيه عمل تعمل إيه، أبشر بارك الله فيك. فيه فرق إنك علمت بيقين أو أحد رأى بعينه أو إن أنت رحت لساحر دجال وقال لك ده زوجتك معمول لها عمل. أحيانًا الإنسان يكون سليمًا مفيش فيه شيء ولا هو ولا زوجته وانت لسه متجوز بقالك فترة بسيطة بارك الله فيك، فإذا به يذهب للدجال فيُعييه هو عشان يشتغل، وهكذا وهذا لا يُصدق. ومن ضمن علامات السحرة إنه يقول لك هات أثر هات شيء أو يسأل عن اسم الأم أو ما شابه في ذلك. الأصل إن إحنا لا نلجأ إلى مثل هذا بارك الله فيك، وما دام مفيش حاجة واضحة تفيد إن فيه عمل فماتجريش في المسألة دي ولا في الطريق ده، واللي قايل لك دجال لا عبرة بقوله بارك الله فيك. طب أنت احتياطي تعمل إيه؟ تقي نفسك ازاي؟ أولًا: في شأن الخلفة عموما قال الله -سبحانه-: "فَقُلْتُ ٱسْتَغْفِرُوا۟ رَبَّكُمْ إِنَّهُۥ كَانَ غَفَّارًا يُرْسِلِ ٱلسَّمَآءَ عَلَيْكُم مِّدْرَارًا وَيُمْدِدْكُم بِأَمْوَٰلٍ وَبَنِينَ وَيَجْعَل لَّكُمْ جَنَّـٰتٍ وَيَجْعَل لَّكُمْ أَنْهَـٰرًا" نوح١٢:١٠ فكثرة الاستغفار والإقبال على الله -سبحانه وتعالى- ودعاء الله -عز وجل-: "ربِ هب لي من لدنك وليا"، وتسأل الله -عز وجل- أن يهبك من الصالحين: "ربِ هب لي من الصالحين".