صدق اللجأ إلى الله، وكثرة الدعاء مع يقين، ادعوا الله وأنتم موقنون بالإجابة، ثقة في قدرة الله -سبحانه وتعالى- أنه قادر على أن يعطي العبد وييسر الأمور للعبد بسبب وبدون سبب، بل وبضد السبب، قادر على كل شيء -سبحانه وتعالى-. وأن فضل الله واسع على عباده المجدين والمقصرين، فنلجأ إلى الله -سبحانه وتعالي- بأن يُذهب ما بنا، دا شيء. الشيء الثاني علاج النسيان من الناحية العملية يكون بكثرة المطالعة، الإشكالية إن مخ الإنسان بيتسع لكثير جداً من المعلومات، وكتير من الناس عايشة مبتستخدمش عشر الطاقة الموجودة في مخها، مهما كان فيها من العلم، لكن بنحتاج إلى أن نعرف كيف نتعامل مع المدخلات وكيف نثبت المعلومة، إذاً علاج النسيان هو في إن الإنسان يصبر على إدخال المعلومة، دي اللي بيتعب فيها في الأول، لكن بيحتاج إلى تكرارها عدد معين عشان مينسهاش، علاج النسيان، نسأل الله أن يذكرنا، الأصل أن فيه إنسان استيعابه بطيء وإنسان استيعابه سريع، فاحنا بنقول إن دا كدا مبينساش ودا بينسي، لأ، الاستيعاب السريع بيخلي المعلومة تدخل في خمس دقايق مثلاً أو أقل، اللي استعيابه بطيء ممكن عشان تدخل اللى ذهنه محتاجة ربع ساعة، نصف ساعة، أكثر، أقل، هكذا، على تفاوت الأشخاص، يبقى أنا المطالب مني لما أحس بنفسي إن أنا بانسي، إن أنا أصبر على نفسي في عملية إدخال المعلومة فترة طويلة، أٌقعد قدامها، الحاجة اللي أنا بذاكرها أو بحفظها أقعد أكررها كذا مرة، حسيت إن أنا حفظتها دلوقتي في خمس دقايق، لأ هكررها كمان عشر دقايق، بعد كدا بساعة تقريبا أحاول أقرأ اللي قرأته مرة تانية، لأن الإشارة في المخ بتبين زي ما قالوا علماء الطب الحديث في هذا، إن المخ بيشوف صور كثيرة جداً في اليوم، وبيدخله معلومات كثيرة، فبيحاول يرميها بعد كدا، فلما أنا آجي أرجع أخد المعلومة وأرجع أقراها بعدها بفترة بسيطة كأني بديله إشارة إن المعلومة دي احنا عايزين نحتفظ بيها فأكرر المعلومة بعدها بساعتين.