السائلة: صمت لحد ١٥ رمضان، وبعد كده جالي نزيف جامد لأني عندي تضخم في الرحم، ومشاكل كتيرة في الرحم، ففطرت باقي الشهر. الشيخ: يعني فطرتي عشان التعب بتاع النزيف، ولا كنتِ فاكراه حيض؟ السائلة: لا، أنا عندي أساسًا نزيف، عندي تضخم في الرحم المفروض إني هعمل عملية.
الشيخ: مقدرتيش تصومي يعني بسبب النزيف عشان الضعف؟
السائلة: أه، فجيت على آخر رمضان روحت للدكتور قالي ملكيش إن أنتِ تصومي، فدلوقتي هو كتبلي برشام يرفع الدم، ففي خلال ما أنا باخد البرشام الدم اترفع بس كل يومين بينزل على هيئة نقط، أنا ببقى محتارة أصلي ولا مصليش؟ الدم ده دم إيه مبقتش عارفة.
الشيخ: بس الدم ده لونه أحمر فاتح مش غامق؟
السائلة: دم بينزل معاه قطع متجلطة، يعنى دم دورة كامل، أما اللي بينزل بعد ما اترفع بالبرشام بيبقى نقط.
الشيخ:  بس، أنا بسألك على ده اللي هو مع البرشام اللي هو سؤالك، اللي بينزل مع البرشام بيبقى دم أحمر فاتح؟
السائلة: بيبقى بهتان، زى ما يكون مكبوب عليه ميه.
الشيخ: تمام تمام، بس ده دم نزيف مش دم حيض، دم استحاضة.
السائلة: أنا ببقى شاكة بقى أصلي ولا مصليش؟
الشيخ: صلي يا أُختي، صلي عادى؛ ده دم نزيف دم استحاضة.
امتى متصليش؟ لما يكون نازل بنفس لون دم الحيض اللي هو الغامق، وفي وقت الحيض ويكون دافعة، لكن الخفيف ده مع البرشام نقطة ولا نقطتين، صومي مفيش مشكلة إن شاء الله.
السائلة: طيب يا فضيلة الشيخ، دلوقتي الأيام اللي أنا فطرتها دى هطلعها فلوس ولا حبوب ولا ايه؟
الشيخ: تقدري تصومي ولا معنتيش تقدري تصومي؟
السائلة: أنا عندي سكر وباخد علاج.
الشيخ: طبيًا ممنوعة من الصيام؟ الطبيب قايلك الصوم غلط عليكِ مع وضعك الحالي ولا لأ؟
السائلة: هو دكتور النسا قالي متصوميش.
الشيخ: حتى بعد الدوا اللي بتاخديه الآن؟
السائلة: مقاليش، مسألتوش.
الشيخ: لازم مراجعة الطبيب، لو كان غلط عليكِ الصيام أطعمي عن كل يوم مسكين، لو حالتك الصحية أصبحت يجوز إنك تصومي حتى لو في الأيام الخفيفة زي أيام الشتا أو كده صومي، الأصل القضاء.
السائلة: طيب لو عايزة أطلع فلوس يا فضيلة الشيخ مكان الصيام؟
الشيخ:الأصل يا أختى راجعي الطبيب بارك الله فيكِ، خلاص اللي فطرتيه فطرتيه بحكم طبيب ١٥ يوم.
حالتك الصحية الآن تسمح بالصيام ويُرجى شفاؤك ولا لا؟ إذا كان حالتك تسمح بالقضاء فلكِ إنك تقضي ولو في أيام الشتاء الخفيفة.
لو كانت حالتك الصحية لا تسمح مطلقًا بالقضاء، فعندئذ أخرجي عن كل يوم مسكين، والأصل تُخرجي طعام إفطار (طعامُ مسكين). فإذا كنتِ مش هتقدري تطعمي، ليكِ إنك تخرجي رز عن كل يوم مثلاً كيلو وربع رز.
مش قادرة تجيبي الرز وتوزعيه، وكّلي جمعية خيرية أو حد يشتري هو قيمة كيلو وربع رز عن اليوم وتخرجيه بارك الله فيكِ.
هذا خُلاصة ما يُقال في هذا الباب بارك الله فيكم.