المياه الصفراء التي تنزل قبل نزول الدم لا عبرة بها؛ لأن الحيض لا يسمى حيضًا إلا بنزول الدم.
لأن أساس الحيض ده ايه؟ عشان دي مسألة مهمة للأخوات في ضبطها، هو دم موجود على جدار الرحم داخل المرأة، فهو طول ما هو في داخل الرحم، أساسًا هو طول الشهر موجود، لما بيجي وقت الدورة بيحصل ارتخاء في الرحم فالدم ينزل، فهنا طول ما الدم ده في داخل الرحم مفيش له أحكام.
امتى المرأة تسمى حائض؟
الحيض ده لغة: السيلان، يبقى بتسمى حائض مع نزول أول دَفعة من الدم، اللي هي ثجة الدم أو دفعة الدم اللي بتنزل دي من هنا ابتدأ الحيض.
المقدمات اللي بتأتي بقى قبل الحيض من كُدرة أو صُفرة لا عبرة فيها تصوم وتصلي وكل شيء، ولا تُمنع أي شيء إلى أن تنزل دَفعة الدم الأولى.
طب لما تنزل دَفعة الدم الأولى؟
هنا في الحالة دي بقى بنعتبر بالدم وبالنقطة، وبالنقطتين، وبالصُفرة، والكُدرة المتصلة بدم الحيض لغاية أما يجي لها حاجة من اتنين: إما الجفاف أو القصة البيضاء -مياه بيضاء بتنزل في نهاية الحيض- ، فتبقى طهُرت بارك الله فيك.
يبقى الصُفرة أثناء الحيض بعد نزول الدم معتبر بها، بتبقى حائض، قبل نزول الدم غير معتبر بها، فعندئذ هي تصوم وتصلي معليهاش أي مشكلة بارك الله فيك.