فيه فرق هنا بين صورتين:

أنا معايا مال ناوي أتبرع بيه، ده مالي الخاص أنا ناوي أتبرع بالمبلغ ده، الإنسان مات وماتبرعش فعندئذ المال ده أصبح معلق بالورثة، الورثة الأمر راجع لهم، إذا أجازوه جميعًا يوزع فجازهم الله خيرًا، لو لم يجيزوا توزيعه فالأصل أنه يتوزع ميراثه؛ لأن ده مال متعلق بهم.
أما لو كان موصي فبيقول المال ده أنا شايله وهخرجه لله ولو مت يخرج لله.
يبقى فيه فرق بين إن أنا معي مال ناوي أخرجه لله وعاجلتني المنية بقى ميراث لازم إجازة الورثة في إخراجه؛ لأن الهبة بتثبت بالتملك والعطاء فأنا ما ملِّكتش اللي أنا واهبه ليه.
أما بالنسبة لو أنا قلت ده مال محدش يقرب له ولو مت المال ده يخرج يبقى وصية. الوصية دي لو أقل من ثلث التركة تخرج، لو أكثر من ثلث التركة بنخرج الثلث بس، فننظر لحالته إيه.
غالب ظني إن سؤالك إن هو الرجل كان ناوي يخرج وعاجلته المنية قبل ذلك، فالأمر معلق بإجازة الورثة بارك الله فيك.