المتصل: بالنسبة لصلاة القصر بكون مثلا فى مشوار وبدخل المسجد أصلي الضهر، وانتهيت من صلاة الضهر حتى لو في جماعة مع أي حد، ومن الممكن إن أنا أدخل مع أي حد بيصلي مثلًا السنة أصلي العصر معاه قصر، عشان أصلي العصر جماعة. الشيخ: أنت بتكون على طريق سفر؟ المتصل: بكون على طريق سفر وفي الطريق مثلا دخلت أى مكان كافيه ولا حاجة بيبقى فيه مسجد فبصلي مثلا الضهر انتهيت من صلاة الضهر ألاقي أي حد بيصلي .. الشيخ: اللي داخل بيصلي إيه اللي انت داخل وراه؟ المتصل: لا احنا صلينا في الأول قصر عادي الشيخ: أنا فهمت أنك صليت الضهر قصر اللى داخل وراه صلاة العصر ده واحد متم ولا واحد إيه؟ المتصل: واحد مخلص إتمام مثلا وبيصلي السنة، فأروح أنا داخل معاه بنية إني أنا أصلي العصر جماعة، فمثلا من الممكن أكون أنا فى الركعة الأولى أو الثانية وهو مثلا أفكرإنهه بيصلي السنة وهو يكون بيصلي الضهر، الشيخ: خلي بالك؛ هتفرق لو بيصلي الظهر أو بيصلي سنة لازم تبقى عارف وإلا متدخلش وراه، لأن اللى بيقصر لو دخل خلف المتم هيتم، لكن لو داخل خلف واحد بيصلي سنة يجوز. المتصل: أنا ببقى دايمً حريص على الجماعة، الفكرة عندي أني بصلي جنب أي حد بيصلي عشان آخذ بس ثواب الجماعة، لو لقيت حد بيقصر ويصلي العصر معايا معنديش مانع، بس أوقات مثلا بيكون المسجد الناس بيصلوا الضهر. الشيخ: لو أنت دخلت خلف اللي بيصلي الظهر وتصلي وراه العصر معنديش مشكلة بس هتصليه تام مش هتقصر هتصلي أربع ركعات. المتصل: أنا دلوقتى دخلت بنيه القصر مثلا إني هاصلي العصر قصر مثلا ولقيت اللى بيصلي بيتم أو صلى ركعتين وسلم أسلم معاه؟ ولو مثلا جاب التالتة والرابعة أتم معاه؟ الشيخ: هو كان بيصلي ضهر ولا سنة؟ المتصل: مانا ممكن أبقى داخل على أنه بيصلي سنة وهو يكون بيصلي الضهر. الشيخ: لا مش ممكن طالما بيصلي ركعتين يبقى الأصل إنه بيصلي سنة، لإن الصلاة خلصت، فلك أن تقصر وخلاص معليكش مشكلة. المتصل: أنا لا أعلم نيته أنا ببقي داخل وهو بيصلي أصلًا. الشيخ: لو هتصلي خلف متم عليك أن تتم، خلف إنسان بيصلي سنة؛ صلاتك صحيحة. مش عارف؟ صلي قصر وصلاتك صحيحة، لأن الأصل أنه بيصلي سنة بعد الصلاة بارك الله فيكم.